Beth yw ein gwasanaeth Blwch Llythyrau?

Mae blwch llythyrau yn galluogi plant mabwysiedig i gadw mewn cysylltiad â’u teuluoedd biolegol trwy lythyrau fel y gallant ddeall mwy am eu hanes personol a chadw cysylltiadau ag aelodau allweddol o’r teulu fel brodyr a chwiorydd.

Mae Blwch Llythyrau Gwasanaeth Mabwysiadu Gogledd Cymru yn wasanaeth rydym yn ei gynnig i bob plentyn sydd wedi’i fabwysiadu drwy chwe awdurdod gogledd Cymru.

Mae hwn yn drefniant sy’n cael ei wneud yn ystod y broses fabwysiadu, a wneir ar ôl ystyriaeth gan weithwyr cymdeithasol a gweithwyr proffesiynol eraill, ac rydym yn hwyluso’r gwasanaeth hwn ar eu rhan. Mae’r rhieni mabwysiadol fel arfer yn gwneud hyn ar ran y plentyn/plant sydd wedi’u mabwysiadu. Ond wrth gwrs, nid yw hyn yn golygu na all y plant gyfrannu. Mae gennym lawer o blant sy’n mwynhau cymryd rhan trwy gynnwys print llaw neu ddarlun, neu weithiau hyd yn oed llythyr wedi’i ysgrifennu â llaw.

Rydym yn argymell bod llythyrau a dderbynnir gan y teulu biolegol yn cael eu rhannu gyda’r plentyn mabwysiadol.

I blant mabwysiedig

Mae cyswllt Blwch Llythyrau yn brofiad cadarnhaol wrth helpu a chefnogi plant mabwysiedig. Mae’n helpu gyda:

• Chadw’r cysylltiadau â pherthnasau arwyddocaol o’r teulu biolegol
• Rhoi cyfleoedd i blentyn neu berson ifanc mabwysiedig gael mwy o wybodaeth a dealltwriaeth o’u hanes teuluol personol a’u cefndir diwylliannol
• Cefnogi dealltwriaeth y person ifanc o’i orffennol a chynorthwyo ei hunaniaeth trwy glywed am newyddion gan y teulu biolegol a digwyddiadau arwyddocaol
• Galluogi plentyn i alaru ei golled
• Rhoi sicrwydd i’r plentyn am les perthnasau biolegol a pharatoi ar gyfer perthnasoedd posibl yn y dyfodol gydag aelodau o’r teulu biolegol.

I rieni mabwysiadol

• I rieni mabwysiadol gall cyfnewid gwybodaeth Blwch Llythyrau eich cefnogi i:
• Gynnal cysylltiadau cadarnhaol â’r teulu biolegol a fydd yn cefnogi hunaniaeth y plentyn
• Bod â chyswllt cyfathrebu gyda’r teulu biolegol, a allai eich galluogi i ddarganfod gwybodaeth nad oedd ar gael adeg ei fabwysiadu (hanes / cyflyrau meddygol a allai fod yn etifeddol)
• Cynnal perthynas ddwyffordd dda rhwng y mabwysiadwyr a theulu genedigol, a all leddfu’r ysfa i blant hŷn chwilio ar gyfryngau cymdeithasol am deulu genedigol
• Helpu’r plentyn i symud ymlaen a datblygu ymlyniad wrth ofalwyr newydd gyda’r gydnabyddiaeth gan deulu genedigol
• Creu atgofion cadarnhaol a rhoi mewnwelediad i daith bywyd y plentyn
• Hyrwyddo sefydlogrwydd mewn lleoliad newydd neu bresennol trwy ddarparu parhad a gwneud bondiau cymorth

I deulu genedigol

I deulu genedigolgall cyfnewid gwybodaeth yn gadarnhaol drwy flwch llythyrau helpu gyda:

• Sicrhau chi a’ch teulu bod y plentyn yn ddiogel ac yn iach
• Rhoi gwybodaeth ddiweddar i chi am y plentyn fel iechyd, lles a datblygiad
• Cynnal cysylltiadau cadarnhaol â’r plentyn, a fydd yn cefnogi synnwyr hunaniaeth y plentyn
• Cynorthwyo’r teulu mabwysiadol i ateb cwestiynau am orffennol y plentyn ac annog perthynas gadarnhaol rhyngoch chi i gyd
• Cynnal y llif cyfathrebu a allai efallai arwain at gyswllt wyneb yn wyneb yn y dyfodol, os bydd y person mabwysiedig yn gofyn am hyn pan fydd yn cyrraedd 18 oed