Canllawiau blwch llythyrau ar gyfer teuluoedd sy’n mabwysiadu

Wrth i’ch plentyn mabwysiedig dyfu’n hŷn, efallai y bydd eisiau gwybod mwy am ei deulu biolegol er mwyn deall ei hanes personol. Dyma ein cyngor a’n harweiniad ar gyfer cadw mewn cysylltiad â’r teulu biolegol trwy ein gwasanaeth Blwch Llythyrau.

Weithiau gall fod yn anodd ac yn frawychus eistedd i lawr ac ysgrifennu llythyr at rieni / perthnasau genedigol eich plentyn. Fodd bynnag, y wybodaeth a anfonwch fel arfer yw’r unig gyswllt sydd gan eich plentyn gyda’i deulu genedigol, ac efallai y bydd eich plentyn eisiau gwybod mwy amdanynt.

Cofiwch eich bod yn rhannu gwybodaeth gyda rhieni / perthnasau genedigol eich plentyn, nid dieithriaid, a bydd ganddynt eu teimladau a’u hatgofion eu hunain am eich plentyn. Os ydych chi’n falch o’ch plentyn, gallwch gael pleser yn rhannu’r balchder hwnnw â’u teulu biolegol.

Mae’n bwysig cofio mai cylchlythyr yw hwn ac nid adroddiad ffurfiol. Mae hefyd yn gyfle i feithrin perthynas dda â theulu biolegol eich plentyn, ac efallai y byddant yn gallu rhoi gwybodaeth i chi am fywyd cynnar a theulu biolegol estynedig eich plentyn.

Enwau

Yr enwau rydych chi’n galw’r rhieni/perthnasau biolegol wrth siarad â’ch plentyn yw’r enwau gorau i’w defnyddio yn y llythyr fel arfer. Fodd bynnag, eich dewis chi yw sut rydych yn cyfeirio atoch chi’ch hun. Efallai yr hoffech lofnodi eich llythyrau gyda ‘[enw’r plentyn] a’r teulu’ neu ‘[enw’r plentyn] a’r teulu mabwysiadol’. Cofiwch, os ydych wedi newid enw eich plentyn ar ôl mabwysiadu, cyfeiriwch ato bob amser yn ôl ei enw geni ym mhob gohebiaeth blwch llythyrau â’r teulu biolegol, gan mai dyma sut y byddant yn adnabod y plentyn.

Cyfeiriadau

Peidiwch â chyfeirio at yr ardal rydych chi’n byw ynddi, defnyddio eich cyfenw, na son am leoedd rydych chi’n ymweld â nhw’n rheolaidd.

Cynnwys y llythyr

Mae’r hyn rydych yn ei ysgrifennu yn eich llythyr yn dibynnu ar oedran eich plentyn. Dros gyfnod o chwe mis neu flwyddyn, mae pob plentyn yn gwneud rhywfaint o gynnydd ac yn dysgu sgiliau newydd.  Ceisiwch gynnwys rhai manylion am gyflawniadau a hobïau newydd, yn enwedig os ydych yn gwybod bod y sgil newydd yn un a rennir gan y rhieni biolegol.

Nid yw bob amser yn ddoeth sôn am unrhyw bryderon sydd gennych am eich plentyn – ni all y rhiant biolegol wneud unrhyw beth amdanynt a gallant fod yn bryderus. Fodd bynnag, mae pob plentyn yn ddrygionus a gall fod yn ddefnyddiol adeiladu darlun mwy realistig os ydych yn cynnwys rhai straeon doniol.

Osgowch nodi oedran eich plentyn; bydd rhieni biolegol yn gwbl ymwybodol o oedran y plentyn.

Er bod ffotograffau yn helpu rhiant/perthynas biolegol i werthfawrogi sut mae’r plentyn yn tyfu’n hŷn, nid yw’r rhan fwyaf o gytundebau yn cynnwys ffotograffau. Felly, mae disgrifiad ysgrifenedig o’i ddatblygiad corfforol ers y llythyr diwethaf hefyd yn bwysig. Mae’r rhan fwyaf o rieni biolegol yn teimlo’n dawelach eu meddyliau gan y ffaith bod eu plentyn yn cael ei garu a’i ofalu amdano’n dda, felly peidiwch â theimlo’n amharod i rannu’r amseroedd hapus yn eich llythyr.

Wrth i blant fynd yn hŷn, efallai y byddant eisiau cyfrannu at eich llythyr. Yn aml, mae angen i rieni arwain y ffordd o ran hyn oherwydd efallai nad yw’r plant yn gwybod beth i’w ddweud. Nid yw’r ffaith nad yw plant yn siarad am eu teuluoedd biolegol yn golygu nad ydynt yn meddwl amdanynt. Bydd hyn, heb os, yn rhoi sicrwydd i’r rhiant biolegol bod eich plentyn yn gwybod rhywfaint am ei hanes ac yn ymwybodol bod ei riant biolegol yn berson go iawn. Gall hefyd eich helpu i ddechrau sgwrs am orffennol eich plentyn.

Efallai yr hoffech gynnwys rhywfaint o waith celf eich plentyn o grŵp chwarae neu’r ysgol i rannu ei gyflawniadau gyda’i rieni biolegol. Efallai, wrth i blentyn dyfu’n hŷn, gellid ei annog i ddewis yr eitemau i’w cynnwys.

Lluniau

Nid yw’r mwyafrif o gytundebau yn cynnwys ffotograffau, fodd bynnag, os yw’r cytundeb yn cynnwys ffotograffau, mae ffotograffau clir wedi’u cynhyrchu’n dda yn bwysig. Mae bob amser yn braf gwybod rhywbeth am y llun. A dynnwyd y ffotograff ar wyliau, neu ei ben-blwydd? Efallai y gallech ysgrifennu’r flwyddyn ar gefn y ffotograff fel y bydd y rhiant biolegol bob amser yn gwybod pryd y cafodd ei dynnu.

Peidiwch â chynnwys ffotograffau o’r ysgol gan y gall y wisg a’r bathodyn ysgol gael eu hadnabod. Peidiwch â chynnwys ffotograffau o unrhyw unigolion eraill a byddwch yn ymwybodol o bwy neu beth sydd wedi’i gynnwys yn y cefndir.

Amser

Bydd y teulu biolegol yn disgwyl derbyn llythyr gennych ar yr amser y cytunwyd arno. Byddwch yn derbyn e-bost atgoffa gan y cydlynwyr cyswllt yn ystod y mis cyn y disgwylir eich llythyr. Os nad yw’r llythyr wedi dod i law gennych yn y mis y cytunwyd arno, mae gennym bolisi atgoffa cadarn ar waith, lle anfonir ail neges atgoffa drwy e-bost a thrydedd neges atgoffa ar ffurf llythyr atoch. Os nad oes unrhyw gyswllt wedi’i wneud ar ôl y drydedd neges atgoffa, bydd rheolwyr yn cysylltu â chi i sefydlu’r rheswm dros beidio ag ymgysylltu.

Bydd y Cydlynwyr Blwch Llythyrau yn cydnabod unrhyw lythyrau a dderbyniwyd gan deuluoedd mabwysiadol. Os na dderbynnir cydnabyddiaeth o fewn pythefnos ar ôl anfon y llythyr, boed hynny drwy’r post neu e-bost, byddem yn eich cynghori i gysylltu â ni i sicrhau eu bod wedi’u derbyn.

Beth fydd yn digwydd os na chawn lythyr?

Weithiau, gall ffyrdd o fyw brysuro a newid, a gall y teulu biolegol golli neu adfer cyswllt. Gall ymagwedd hyblyg tuag at gyswllt fod o fudd enfawr i’r plentyn yn yr hirdymor. Nid yw’n anarferol i deuluoedd biolegol gael trafferth cymryd rhan yn y camau cynnar ar ôl colli plentyn i fabwysiadu.  Byddem yn eich annog i barhau i gynnal y cytundeb blwch llythyrau a pharhau i ysgrifennu yn ystod y misoedd cyswllt y cytunwyd arnynt.

Newyddion brys

Os oes gennych newyddion brys perthnasol (fel salwch neu farwolaeth) ynglŷn ag aelod o’r teulu mabwysiadol rydych yn teimlo bod angen ei rannu â’r Tîm Blwch Llythyrau cyn yr amser cyswllt y cytunwyd arno, cysylltwch â ni i drafod hyn gyda ni.

Rydym yn deall efallai yr hoffech drafod rhai agweddau ar ysgrifennu llythyrau a byddwn yn hapus i’ch helpu a’ch cefnogi.